Məxfilik Siyasəti

Bu səhifə yolAi-nin hansı məlumatı topladığını, niyə topladığını, nə qədər saxladığını və sizin nə edə biləcəyinizi izah edir. Məqsəd tam siyahı verməkdir: aşağıda sadalanmayan başqa bir toplama yolu yoxdur.

Ən qısa cavab: hesab məlumatınız, söhbətləriniz, saytdan istifadə statistikası və — yalnız anonim ictimai sual verildikdə — sualın gəldiyi IP ünvanı. Reklam və ya izləmə məqsədli kuki istifadə etmirik və məlumatınızı reklam üçün satmırıq.

Hesab yaratdıqda e-poçt ünvanınızı (və ya Google ilə daxil olduqda Google-un verdiyi əsas profil məlumatlarını) saxlayırıq. Profil adınızı özünüz təyin edirsiniz.

Profil adınız saytın bəzi ictimai yerlərində görünə bilər — həftəlik reytinq lövhəsində və dərc etdiyiniz təcrübə qeydlərində. E-poçt ünvanınız isə HEÇ VAXT digər istifadəçilərə göstərilmir.

Söhbət tarixçəniz — yazdığınız suallar və aldığınız cavablar — hesabınıza bağlı saxlanılır ki, əvvəlki söhbətlərinizə qayıda biləsiniz.

Söhbətə şəkil əlavə etsəniz, o şəkil serverdə SAXLANILMIR. Nişanı tanımaq üçün yaddaşda emal olunur və cavab hazırlandıqdan sonra atılır; səhifəni yeniləsəniz şəkil itir. Bu, qüsur deyil — qəsdən belədir.

Hesab olmadan da sual verə bilərsiniz. Bu halda sualınız və cavabı ictimai sual arxivində dərc oluna bilər — sual mətni orada görünür.

Anonim verilən sualın gəldiyi IP ünvanını saxlayırıq. Bu, sui-istifadəyə qarşı tədbirdir. IP ayrıca, məhdud cədvəldə saxlanılır: onu yalnız sayt administratoru görür, ictimai sual səhifələrində göstərilmir və heç bir ziyarətçi ona çata bilmir. Sual silinəndə IP də silinir.

Gündəlik istifadə həddini hesablamaq üçün isə xam IP deyil, onun birtərəfli şifrələnmiş izi saxlanılır — həmin izdən IP ünvanını geri çıxarmaq mümkün deyil.

Hesabla daxil olub sual verdikdə IP ünvanınız bu şəkildə saxlanılmır.

Hansı səhifələrin oxunduğunu ölçürük: baxılan səhifənin ünvanı, cihaz növü (mobil / masaüstü / planşet) və saytа haradan keçdiyiniz (yalnız mənbə saytın adı, məsələn «google.com» — tam ünvan yox).

Bu ölçmədə IP ünvanı ÜMUMİYYƏTLƏ istifadə olunmur. Bunun əvəzinə brauzeriniz öz yaddaşında təsadüfi bir nömrə saxlayır və statistika onunla aparılır. Həmin nömrə şəxsiyyətinizi göstərmir; brauzer yaddaşını təmizləsəniz yeni ziyarətçi kimi sayılırsınız.

Saxlama müddəti məhduddur: «indi saytdadır» qeydləri 7 gündən, səhifə baxışı qeydləri 90 gündən sonra avtomatik silinir.

Bildirişlərə icazə versəniz, brauzerinizin verdiyi bildiriş ünvanını və ona aid şifrələmə açarlarını saxlayırıq — bildiriş göndərmək texniki olaraq yalnız bununla mümkündür.

Bu, brauzerin verdiyi texniki ünvandır; içində ad, e-poçt və ya yerləşmə məlumatı yoxdur. İcazəni brauzer parametrlərindən geri ala bilərsiniz; hesabınızı silsəniz bu qeydlər də silinir.

Bəzi səhifələrdə öz təcrübənizi yaza bilərsiniz. Bu qeydlər moderasiyadan keçdikdən sonra həmin səhifədə İCTİMAİ olaraq dərc olunur.

Qeydin yanında dərc anındakı adınız görünür. E-poçt ünvanınız dərc olunmur. Ad dərc anında yazıldığı üçün sonradan profil adınızı dəyişsəniz köhnə qeydin altındakı ad dəyişməz qalır.

Hesabınızı silsəniz, yazdığınız təcrübə qeydləri də silinir.

Paket alsanız, hansı paketə sahib olduğunuzu, statusunu və müddətini saxlayırıq.

Hazırda saytda avtomatik ödəniş sistemi yoxdur — paketlər əl ilə təyin olunur, ona görə kart və ya bank məlumatınızı toplamırıq və saxlamırıq.

Testlərdə topladığınız həftəlik xallar reytinq lövhəsində digər istifadəçilərə görünür. Lövhədə yalnız profil adınız və xal sayınız göstərilir.

Profil adınız boşdursa, orada sadəcə «İstifadəçi» yazılır. E-poçt ünvanınız lövhədə heç vaxt görünmür.

Sualınıza cavab hazırlamaq üçün sual mətnini süni zəka modelinə göndəririk (istifadə olunan provider-dən asılı olaraq Anthropic Claude, Google Gemini və ya OpenRouter üzərindən üçüncü tərəf modellər). Modelə e-poçtunuz, adınız və ya IP ünvanınız göndərilmir.

Sualı sənədlərlə uyğunlaşdırmaq üçün aparılan hesablama isə öz serverimizdə yerli olaraq işləyir — bunun üçün heç bir xarici xidmətə məlumat göndərilmir.

Daxil olma vəziyyətinizi yadda saxlamaq üçün yalnız zəruri sessiya kukilərindən istifadə edirik (Supabase Auth vasitəsilə). Reklam və ya izləmə məqsədli kuki istifadə etmirik.

Məlumatlarınızı reklam məqsədilə üçüncü tərəflərə satmırıq. Yalnız xidmətin işləməsi üçün zəruri olan təchizatçılar məlumata çata bilər: verilənlər bazası və autentifikasiya üçün Supabase, cavab hazırlanması üçün yuxarıda adı çəkilən AI provider, bildiriş göndərilməsi üçün brauzerinizin öz bildiriş xidməti.

Saytda hazırladığımız qısa videoları öz TikTok hesabımızın qaralamalarına göndərmək üçün TikTok-un rəsmi Content Posting API-sindən istifadə edirik.

Bu inteqrasiya YALNIZ yolAi-nin öz TikTok hesabına aiddir. Sizin TikTok hesabınıza qoşulmuruq, sizdən TikTok icazəsi istəmirik və sizə aid heç bir məlumatı — hesab məlumatlarınızı, söhbətlərinizi, IP ünvanınızı, statistikanızı — TikTok-a göndərmirik.

TikTok-a göndərilən yeganə şey saytın öz məzmunundan hazırlanmış videodur (yol nişanı, cərimə maddəsi, test sualı kimi ictimai məlumat) və onun mətni.

Bu iş üçün serverimizdə yalnız öz hesabımızın TikTok giriş açarları saxlanılır. Həmin açarlar istifadəçilərə açıq deyil və istənilən vaxt TikTok tərəfindən ləğv edilə bilər.

Video TikTok-da avtomatik dərc OLUNMUR — yalnız qaralamaya düşür və dərc qərarını insan verir.

Söhbət tarixçənizi istənilən vaxt Söhbət bölməsindən silə bilərsiniz. Hesabınızı tamamilə silmək üçün Hesabım səhifəsindəki seçimdən istifadə edin və ya bizə yazın.

Hesab silinəndə sizə aid data silinir: söhbətlər və mesajlar, bildiriş qeydləri, təcrübə qeydləri, test cavablarınız, dəvətlər və coin köçürmə tarixçəniz.

Bir şeyi açıq yazmaq istəyirik: saytın ÜMUMİ MƏZMUNU silinmir. Əgər sayta sənəd yükləmisinizsə, test sualı və ya kurs yaratmısınızsa, həmin məzmun yerində qalır və sadəcə müəllif bağlantısı silinir — yəni artıq sizinlə əlaqələndirilmir. Bu, qəsdən belədir: əks halda bir hesabın silinməsi bütün istifadəçilər üçün sənəd korpusunu və test bankını yox edərdi.

Sizə aid məlumatın nüsxəsini istəyə, düzəldilməsini və ya silinməsini tələb edə bilərsiniz. Bunun üçün aşağıdakı e-poçt ünvanına yazmağınız kifayətdir.

Məxfilik siyasəti ilə bağlı suallarınız üçün qurbanovzaur078@gmail.com ünvanına yaza bilərsiniz.